Foreininga Bevar Ålfjordens Perle sende i dag denne e-posten til Statsforvaltaren i Rogaland og til Vindafjord kommune:
From: Bevar Ålfjordens perle <alfjordensperle@gmail.com>
Sent: 02 March 2026 13:04
To: marita.falnes@statsforvalteren.no; sfropost@statsforvalteren.no; Thomas Vestbø <thomas.vestbo@vindafjord.kommune.no>; Ingrid Johannessen <ingrid.johannessen@vindafjord.kommune.no>
Cc: postmottak@vindafjord.kommune.no
Subject: Sak 2023/3144, Kommentarar og innvendingar til fagrapport frå Dommersnes AS (Norconsult) – “Fagrapport luftkvalitet” – Dommersnes Industriområde”
Hei,
Ei av motsegnene Statsforvaltaren i Rogaland (SFR) har hatt til planforslaget for Windafjord Port på Dommersnes i Vikebygd, gjeld “Luftkvalitet”.
Som tilsvar til denne motsegna utarbeidde tiltakshavar “Fagrapport luftkvalitet”.
Det vert vist til foreininga Bevar Ålfjordens Perle sin e-post til SFR og Vindafjord kommune (VK) datert 30.09.2025 med våre innvendingar til tiltakshavar sin “Fagrapport luftkvalitet“.
SFR svara i brev til VK datert 04.12.2025 (SFR referanse 2023/12675) at motsegna knytt til luftkvalitet er å ansjå som løyst basert på tiltakshavar sin nemnde “Fagrapport luftkvalitet”.
Utdrag frå SFR sitt svarbrev til VK vedrørande luftkvalitet:
“Rapporten konkluderer med at luftkvaliteten vil bli noko forringa i perioden det skjer uttak og utskiping av masser. Masseuttak og tilarbeiding av masser, og anleggsarbeid og anleggstrafikk vil kunne gi støvflukt til nærliggande omgjevnader i
ein periode over fleire år. Ved oppfylling av alle krav i forureiningsforskrifta kapittel 30 skal ikkje luftkvalitet ved dei råka bustadene overstige grenseverdiar for luftkvalitet. Det er ikkje forventa at bygningar utanfor influensområdet, slik det er definert i rapporten, vil bli råka. Når driftsfasen startar, vil luftkvaliteten betrast etter kvart som dei støvgenererande aktivitetane blir avslutta.
I fagrapporten er det peika på døme på avbøtande tiltak i retningslinje for handsaming av luftkvalitet i arealplanlegginga, T-1520. Det vil vere nødvendig å gjennomføre fleire av desse for å redusere belastninga på omgjevnadene. Føresegnene sikrar likevel ikkje konkrete avbøtande tiltak. Krav til innhald i miljøoppfølgingsplan, omtaler støvspreiing i føresegn 2.8.7. Vi legg til grunn at verksemd i anleggsperioden held seg innanfor krava i forureiningsforskrift sitt kap. 30.”
I tilbakemeldinga frå SFR vert det m.a.o. vist til krava i Forurensningsforskriftens kap. 30 som tiltakshavar må oppfylla for at motsegna skal kunne bli ansett som løyst.
Massehandteringsplanen som tiltakshavar har utarbeidd for Windafjord Port viser at bergartane på Dommersnes består av granitt og migmatitt. Desse inneheld mykje kvarts.
Forurensningsforskriftens kap. 30 omtalar ikkje kvartsstøv og problematikk rundt dette. Ved sprenging, knusing og transport av slike bergartar, vil det bli danna finfordelt, respirabelt kvartsstøv. Dette er støv som er godt dokumentert som helseskadeleg. I følge STAMI (Statens arbeidsmiljøinstitutt) finst det ikkje noko nedre grense for når kvartsstøv kan vera skadeleg.
Desse kvartspartiklane kan ha ein øydeleggande verknad på lunger og luftvegar. Dei kan påføre menneske fleire sjukdomar, som kols, silikose og kreft. Det kan gå så lenge som 30–40 år før eventuell kreft bryt ut. Dette gjeld kommande generasjonar – barn, barnebarn og oldebarn. Arbeidstilsynet påpeikar også farene ved respirabelt kvartsstøv, at det er kreftframkallande og kan føra til lungekreft.
Likevel blir det ofte vist til at STAMI har sett ein administrativ norm på 0,05 mg/m³ luft. Den administrative normen blei halvert i 2022, nettopp på grunn av urovekkjande funn knytte til kombinasjonen kvarts og lungesjukdomar.
Det som sjeldan blir sagt tydeleg, er at denne grenseverdien gjeld utelukkande for arbeidstakarar – vaksne personar med opplæring, verneutstyr, helseoppfølging og avgrensa arbeidstid. Barn og andre innbyggjarar er ikkje omfatta av dette vernet. Dei er i realiteten heilt forsvarslause. Når det blir sprengt og bora, oppstår støvskyer som blir drivne med vinden – alt etter kvar du oppheld deg når støvskya treff.
Dommersnes ligg frå nokre hundre meter til om lag 1,5 km frå Vikebygd sentrum, der det finst barn, barnehagar, skular, hytter og vanlege bustadar. Dette bør gi eit ekstra varsku. Barn pustar meir luft per kilo kroppsvekt enn vaksne, og lungene deira er framleis under utvikling. Eksponering skjer utan varsling, verneutstyr eller kontroll.
Spørsmål til Statsforvaltaren i Rogaland:
Sidan den henviste Forurensningsforskriftens kap. 30 ikkje omtalar farane ved- og tiltak mot respirabelt og kreftframkallande kvartsstøv ved sprenging, knusing og transport, korleis kan motsegna som gjeld luftkvalitet bli ansett som løyst og innbyggjarane i Vikebygd og Sveio vera verna mot slikt støv?
Spørsmål til Vindafjord kommune:
Korleis vil Vindafjord kommune sikra innbyggjarane i Vikebygd og Sveio mot dei kreftframkallande farane ved respirabelt kvartsstøv frå sprenging, knusing og transport på Dommersnes?
Mvh
Bevar Ålfjordens Perle i Vikebygd v/styreleiar Jon Magne Svendsbøe
*****
Dei klarer ikkje å begrensa støvet på Europas største pukkverk hjå Mibau Stema AS på Jelsa i Suldal, så kvifor skal me tru det blir betre på Dommersnes?
(Foto lånt med lov frå La Sandsfjorden Leva! facebook-gruppa)
