9. mars 2026 sende me denne e-posten til alle politikarane i Vindafjord:
Hei alle kommunestyrepolitikarar i Vindafjord.
Reguleringsplan for Windafjord Port i Vikebygd skal snart opp til endeleg politisk avgjerd.
Med kunnskap om alle utgreiingar og konsekvensanalysar som er gjort, vil de verkeleg stemma Ja til reguleringsplan for Windafjord Port?:
– som ignorerer den lokale folkeviljen som seier nei til det enorme naturinngrepet (197 fastbuande vikebuar over 16 år og 267 hyttebuande samt 111 sveibuar på vestsida av Ålfjorden har signert oppropet mot planforslaget). Namnelista er vedlagt. Røysta til dei som eig fritidseigedom Vikebygd må også bli høyrd då dei betalar eigedomsskatt til kommunen, på lik linje med eigarar av bustad.
– som opnar for utsprenging av eit krater på 11 millionar m3 fjell, som tilsvarer volumet av 94 stk. Oslo Plaza hotell (grunnflate 1000m2 + høgde 117m = 117.000 m3)! Ved sprenging aukar steinvolumet typisk 1,6 gonger til eit volum tilsvarande heile 150 stk. Oslo Plaza hotell.
– som vil bli eit av Noregs største masseuttak ifølgje Direktoratet for Mineralforvaltning (DMF).
– som vil bandleggja ca. 430 dekar (60 fotballbanar) med ein tidshorisont utan grense, noko som vil påverka takst på eigedommar rundt negativt samt skapa stor uvisse mtp. investeringar og vedlikehald for eksisterande bedrifter på Dommersnes.
Til visuell samanlikning blir arealet 60% større enn planert Amrock-areal i Espevik i Tysvær (ca. 300 dekar).
– der berre 36,5% av ynskt areal er gjenbruk av “grått” areal sjølv om tiltakshavar reklamerer med utnytting av grått areal. I tillegg kjem naudsynt omlegging av fylkesvegen i urørt natur som reduserer dette prosenttalet ytterlegare.
– som vil påføra innbyggjarane støyplage under sprengings-/knusings-/transportarbeid i 7 eller fleire år.
– som vil påføra innbyggjarane støvplage under sprengings-/knusings-/transportarbeid i 7 eller fleire år. Sprenging av granitt gir helsetruande kvartsstøv som kan medføra silikose med same sjukdomsforløp som asbestose, dvs. lungekreftframkallande. Sjå også nyleg lesarinnlegg i Grannar samt vedlagte foto av sprengingsstøvskyer frå pukkverket til Mibau Stema AS på Jelsa der dei ikkje klarer å unngå omfattande støvspreiing.
– som lokalt vil medføra redusert livskvalitet liknande bygda Høyvik på Jelsa opplever grunna støv og støy frå pukkverket til Mibau Stema Norge AS.
– som vil medføra 60 lastebillass med grus/pukk kvar vekedag i 7 år ut på vår smale fylkesveg som mest sannsynleg må passera 30 km/t sona i Isvik kor trafikktilhøva er farlege som dei er. 60 lass til dagen tilsvarar 300 lass i veka og 15000 lass i året. Og så skal tom lastebil tilbake. Då doblast desse tala til 120 Isvik-passeringar pr. dag eller 30000 Isvik-passeringar i året! Over 7 år skal 105000 lastebillass ut frå Dommersnes (eller 210000 enkeltturar om ein tek med retur av tom lastebil).
– som vil medføra 181 skipsanløp i året eller 1267 skipsanløp over 7 år for å frakta vekk stein.
– som vil fjerna tre idylliske hytter samt fylla ut Brunnavika i Ålfjorden.
– som vil omgjera 400m strandlinje av Ålfjordens Perle til kaiområde.
– som ikkje har nokon uttalt plan eller konsekvensutgreiing (KU) for kva som skal skje med eksisterande bedrifter på Dommersnes.
– som KU seier vil medføra “svært stor negativ konsekvens” for naturmangfaldet på land.
– som vil gå på tvers av målet til Vindafjord kommune om å ta vare på naturmangfaldet i kommunen samt målet om å ta vare på karbonrikt areal.
– som vil bidra til pågåande bit-for-bit nedbygging av myr og natur i Noreg.
– som KU seier vil medføra “stor negativ konsekvens” for landskapet i bygda og Ålfjorden.
– som KU seier vil medføra “svært stor negativ konsekvens lokalt” for klimagassutslepp under anleggsperioden.
– som legg opp til brakkerigg med 200 overnattingsplassar for tilreisande arbeidarar som ikkje vil skatta til Vindafjord men til den norske stat om dei er utlendingar, samt medføra ekstra trykk på brannberedskapen og helsetenestene i kommunen.
– som i KU ikkje klarer å fastslå om det blir netto tilflytting eller fråflytting frå Vikebygd eller Vindafjord som følgje av inngrepet.
– som lovar ein “ny vår” for Vikebygd, mens samanlikning med Suldal viser det motsette. Storindustri som pukkverket på Jelsa har fleire ledige jobbar og likevel er det ein nedgang i folketalet med 48 i Suldal og største fødselsunderskotet i Rogaland i 2025.
Det er ingen skam å snu!
Lytt til dei unge i Vikebygd som ikkje vil ha dette gigantprosjektet, og stem Nei til reguleringsplanforslaget for Windafjord Port!
Vennleg helsing det klare fleirtalet av grunneigarar i Vikebygd som har signert mot reguleringsplanforslaget, representert ved foreininga Bevar Ålfjordens Perle i Vikebygd, v/styreleiar Jon Magne Svendsbøe